‘Uda' ‘olulh whun tulhyih te ‘ut'an cha whulih. Chuntoh nuts'uwhulyeh ‘ink'ez ‘ut'an cha, duchun yaz the k'unuzduyuz ‘i ooghun nuts'uwhulyeh. nets'oda'ne nehunilh'en ‘et ‘unehutni, dah hutni. Duchun yaz diha k'unuduhyuz, ne k'un'a dune inle' ‘uda'. Oot'ooz hanulhch'ul hubundulhda, whute nuyeh. Dincha suli' de ‘i ts'iyane ye'tit'elh wheni ‘uyinla. ‘aw'ilhogun ch'e' ulhtisle'i yoh te, ‘ukoh naditel huba ‘uyinla, lhadun be' whul'en.

‘Uda' t'ughus ‘ink'ez ts'oo tsun dune hinli whe lhe hunt'az, t'ughus lhez tahinino , ‘andit t'ughus ooka lhez ‘awet dunt'oh, ‘et la t'ughus dunadiltloh ‘ink'ez ts'oo tsun whusayalhti whenus kwun dizk'un-i k'eyino. ‘Andit ts'oo tsun ooka ch'uluz suli'. ‘Andit ts'oots'un ‘awet dunt'oh ch'uluz. ‘I ‘andit yoo ts'ut'i.

‘Et la chuntsi ‘ink'ez ts'itel ‘enne cha dune hinli da' ‘et lhehudint'az whe lhuztih be whe' lho nil'en, whula chuntsi ts'itel yuka ne'ust'az, ‘et la ts'itel k'unayul'en, whula nahult'oh bu kane'‘ustaz, ‘andit dzin whuts'un ‘awet duhint'oh. ‘Uyoo duchun tila ‘et duhit'en tila ‘et duhit'en whunawhudiznoh.

Undi duchun Yak'usda ts'iyane ba ‘uyinla. ‘Aw ‘ilhoghun ch'e' ulhtisle, whe ‘andit nedo ch'e' huyut'i ‘ink'ez hiye'ooduket. ‘Aw ‘ilho duchun k'uzdotselh ait'oh. Ndi duchun lhe'ultsuk sooniya huye' ‘inla ‘ants'i lhe'hoont'oh whe buch'a na yudeh. ‘Andit yinka dulcho noduk'un ‘et lhe ‘ultsukne dune nahinoolhneh hukwa' huyulh'en. ‘Enne sooniya lhai k'elha ‘uhut'en. Ndi sooniya whe'uhuyinla ‘i ‘ants'i le' hoont'oh whe buch'a nayudeh Yakusda ubulhhunilch'e . Tsi'yanne ba duchun ‘uyinla huye' oot'e' ha.

Tsiyai duchun ‘ink'ez khunai te ts'iyawh dune inle'. Hutni netsoda'ne.